Monday, September 19, 2011

កម្ពុជា​ប្រឈម​កាន់​តែ​ធំ​ពេល​កិច្ច​ព្រម​ព្រៀង​ទំនិញ​អាស៊ាន​មក​ដល់

ដោយ: ភ្នំពេញប៉ុស្តិ៍

ភ្នំពេញៈ នោះ​ជា​ការ​ខាត​បង់​​សម្រាប់​ប្រទេស​នាំ​ចូល​​ច្រើន​ជាង​នាំ​ចេញ ដូច​ជា​កម្ពុជា​។ ការ​នាំចេញ​សំខាន់​ជាង​​គេ​របស់​​កម្ពុជា​នៅ​ពេល​នេះ គឺ​​សម្លៀក​​បំពាក់ និង​​ផលិត​ផល​កសិ​កម្ម ដូច​ជា​អង្ករ​ជាដើម​។​ តែ​​​ទំនិញ​ ឬ​​ផលិត​ផល​ផ្សេង​ទៀត​​ កម្ពុជា​ស្ទើរ​តែ​​នាំ​ចូល​​ទាំង​ស្រុង​​សម្រាប់​​ផ្គត់​ផ្គង់​​។

ឧទាហរណ៍​តូច​មួយ​ គ្រាន់​តែ​ការ​នាំ​ចូល​ភេសជ្ជៈ និង​គ្រឿង​ឧបភោគ​ ​បរិភោគ​នៅ​ឆមាស​ទី​មួយ​​នេះ​​​​​កើន​ឡើង​២៨​ភាគ​រយ។

និយាយ​ត្រឹម​តែ​ទីផ្សារ​ក្នុង​តំបន់ ការ​នាំ​ចេញ​របស់​កម្ពុជា​ទៅ​កាន់​ប្រទេស​​ថៃ​ ដែល​ជា​ដៃ​គូ​ពាណិជ្ជ​កម្ម​​ធំ​​ធ្លាក់ចុះ​នៅ​ឆមាស​ទី​មួយ​ ខណៈ​ការ​នាំចូល​ពី​ថៃ​នៅ​តែ​បន្ត​កើន​ឡើង។ ការ​នាំ​ចេញ​របស់​​កម្ពុជា​ទៅ​វៀត​ណាម ក្នុង​រយៈ​ពេល​៥​ខែ បាន​កើន​តែ​៣ភាគរយ​ប៉ុណ្ណោះ ​ស្រប​ពេល​​ការ​នាំ​ចូល​​​ពី​វៀត​​​ណាម កើន​​​១៣​៩​ភាគ​រយ។

កម្ពុជា​​ជាទូ​ទៅ​នាំ​ចេញ​ទំនិញ​មិន​​​​ទាន់​​កែ​ច្នៃ ហើយ​នាំចូល​មក​វិញ​​​នូវ​ផលិត​ផល​សម្រេច។ នេះ​បញ្ជាក់​​ថា កម្ពុជា​ត្រូវ​ខាត​​បង់​ថ្លៃ​ដើម​រួច​ជា​ស្រេច​ទៅ​ហើយ ពិសេស​​ថ្លៃ​ពលកម្ម​។

ទាំង​នេះ​បង្ហាញ​ពី​កម្សោយ​នៃ​ផលិត​កម្ម​ទាំង​សម្រាប់​ការ​ផ្គត់​ផ្គង់​ក្នុង​ស្រុក​ និង​នាំ​ចេញ។

សព្វ​ថ្ងៃ​នេះ​កម្ពុជា​ទទួល​បាន​ផល​ចំណេញ​ច្រើន​ពី​ទីផ្សារ​អឺរ៉ុប ក្រោម​​គម្រោង «អ្វី​ៗ​គ្រប់​យ៉ាង​លើក​លែង​តែ​អាវុធ​​» ដែល​ភាគ​ច្រើន​​នាំ​ចេញ​សម្លៀក​បំពាក់ ប៉ុន្តែ​អ្នក​ជំនាញ​ជា​ច្រើន​បាន​លើក​ឡើង​ថា​កម្ពុជា​ត្រូវ​តែ​ធ្វើ​ ឲ្យឧស្សា​ហ​ក​ម្ម​​នាំចេញ​របស់​ខ្លួន​មាន​ភាព​ចម្រុះ​បែប​ ដើម្បី​ទីផ្សារ​ប្រកួត​ប្រជែង ពេល​អនាគត ព្រោះ​វិស័យ​កាត់​ដេរ​មួយ​មុខ ​មិន​អាច​ជួយ​កំណើន​សេដ្ឋ​កិច្ច​យូ​រអង្វែង​ទេ ជាក់​ស្តែង​វិស័យ​នេះ​កំពុង​អ៊ុត​មើល​សេដ្ឋ​កិច្ច​អាមេរិក ដែល​ជាទីផ្សារ​ធំ​​។

កំណើន​នៃ​ការ​នាំ​ចូល​ទំនិញ​បង្ហាញ​ពីការ​កើន​ឡើង​នៃ​សេដ្ឋ​កិច្ច​របស់​ ប្រទេស​ ប៉ុន្តែ​ការ​នាំ​ចូល​របស់​ប្រទេស​មួយ​​​ មិន​គួរមាន​គម្លាត​ឆ្ងាយ​ពី​ការ​នាំ​ចេញ​របស់​ខ្លួន​ពេក​ទេ បើ​មិន​ដូច្នេះ​ឱន​ភាព​ពាណិជ្ជ​កម្ម​មាន​កាន់​តែ​ធំ ពោល​គឺ​យើង​ត្រូវ​ចំណាយ​ច្រើន​ជាង​ចំណូល រី​ឯ​ឱកាស​នៃ​ការ​ប្រកួត​ប្រជែង​មាន​កាន់​តែ​ទាប។

ការ​លើក​ឡើង​នេះ មិន​ទាន់​និយាយ​​ដល់​​កិច្ច​ព្រម​ព្រៀង​ដោះ​ដូរ​ទំនិញ​ក្នុង​សមាគម​អាស៊ាន​ និង​ចាប់​ផ្តើម​នៅ​ឆ្នាំ​២០​១៥ ទេ។

កិច្ច​ព្រម​ព្រៀង​នេះ​នឹង​អនុញ្ញាត​ឲ្យ​មាន​ការ​ដោះ​ដូរ​ទំនិញ​ដោយ​សេរី​ ក្នុង​ចំណោម​សមាជិក ដោយ​មិន​គិត​ពន្ធ​។ ​កម្ពុជា​ត្រូវ​ប្រឈម​នឹង​​ការ​ខាត​បង់ ប្រសិន​បើ​ប្រទេស​នេះ​នៅ​​តែ​មិន​អាច​ផលិត​សម្រាប់​នាំ​ចេញ​​ឲ្យ​បាន​ ច្រើន​នោះ​។

កម្ពុជា​នឹង​ទទួល​បន្ទុក​ក្នុង​ការ​ប្រកួត​ប្រជែង​ទាំង គុណភាព​ និង​បរិមាណ ទាំង​ទីផ្សារ​ក្នុង​ស្រុក និង​ក្រៅ​ស្រុក​។​​ ​កិច្ច​​ព្រម​ព្រៀង​ពាណិជ្ជ​កម្ម​​សេរី​​អាស៊ាន​-ចិន​ជា​បន្ទុក​មួយ​ទៀត​ កម្ពុជា​ត្រូវ​ទប់​ទល់​​ទំនិញ​​ពី​ចិន​ ដែល​ជា​ការ​ប្រកួត​មួយ​ដ៏​ធំ​៕


No comments:

Post a Comment