យើងជាខ្មែរ យើងចែករំលែក ដើម្បីភាពរីកចំរើនទាំងអស់គ្នា: November 2011

Wednesday, November 2, 2011

រឿងរ៉ាវទាក់ទងនឹងខ្ទឹមបារាំង

នៅពេលអានសៀវភៅស្ដីពីចំណេះដឹងប្លែកៗត្រង់វិធីចិតខ្ទឹមបារាំងមិនឲ្យហូរទឹកភ្នែក ខ្ញុំគិតមមៃក្នុងចិត្តថា ចិត្តខ្ទឹមយ៉ាងម៉េច មិនប្រយ័ត្នទេអីបានជាបណ្ដាលឲ្យហូរទឹកភ្នែក ?

ស្រាប់តែកាលពីម្សិលម្ង៉ៃនេះ ប្រហែលដោយសម្រាកមិនបានគ្រប់គ្រាន់ផង ទឹកភ្នែករបស់ខ្ញុំស្រាប់តែហូរច្រោកៗតែម្ដង នៅពេលចិត្តខ្ទឹមបារាំងតែពីរមើមប៉ុណ្ណោះដើម្បីដាក់ផ្ទាប់ជាមួយត្រីខកំប៉ុង ។ ពេលនោះទើបនឹកឃើញថា វិធីចិត្តខ្ទឹមបារាំងមិនឲ្យចេញទឹកភ្នែកពិតជាមានប្រយោជន៍ផស់គេមែន !

វិធីមិនឲ្យហៀរទឹកភ្នែកនៅពេលចិតខ្ទឹមបារាំង និងខ្ទឹមក្រហម

មុនពេលហាន់ ឬដំខ្ទឹមក្រហម ឬខ្ទឹមបារាំង ចូរយកឈើគូសដែលពុំទាន់បានគូសអុជនៅឡើយមកខាំបៀមនៅនឹងមាត់ឲ្យក្បាលឈើគូសចេញមកក្រៅ ហើយចាំចាប់ផ្ដើមចាត់ការជាមួយខ្ទឹមក្រហម ឬខ្ទឹមបារាំងរបស់អ្នកចុះ ។ ការណ៍នេះពីព្រោះក្បាលឈើគូសមានសារធាតុជួយបឺតស្រូបក្លិនឆួលរបស់ខ្ទឹមក្រហម ឬខ្ទឹមបារាំងមិនឲ្យមករំខានក្រពេញទឹកភ្នែករបស់យើងទេ ។ ឲ្យតែបានបៀមឈើគូសបែបនេះ ទោះជាអ្នកធ្វើការនៅជាមួយនឹងខ្ទឹមបារាំង ខ្ទឹមក្រហមប៉ុន្មានម៉ោង ប៉ុន្មានថ្ងៃក៏ទឹកភ្នែកមិនព្រមហូរស្រក់ដែរ ។ តែបើទឹកភ្នែកហូរស្រក់ព្រោះបេះដូង ឈើគូសមិនអាចជួយបានទេ ។

ខ្ទឹមបារាំង

បន្ធូរការឈឺត្រចៀកដោយមើមខ្ទឹមបារាំង

ពេលអ្នកមានអារម្មណ៍ ឬក៏ដឹងថាឈឺត្រចៀក គឺអ្នកត្រូវដោះស្រាយបញ្ហាទាំងនេះបានខ្លះដោយមើមខ្ទឹមបារាំង ព្រោះមើមខ្ទឹមបារាំងនេះមានសារធាតុប្រេងឆួលៗជួយបន្ធូរបន្ថយអាការឈឺត្រចៀក និងការរលាកត្រចៀកបានយ៉ាងល្អ ។

វិធីៈ យកមើមខ្ទឹមបារាងមកហាន់ជាចំណិតសរសៃតូចៗប្រហែលមួយមើម ហើយយកទៅដាក់ក្នុងកំណាត់សស្ដើងតូចមួយខ្ចប់ឲ្យណែន រួចយកទៅដាក់ស្អំនឹងបំពង់ទឹកចាក់ពីកំសៀវដែលដាំពុះហុយៗមួយសន្ទុះ ទើបលើកយកអ្នកផ្ទប់ត្រចៀកស្អំឲ្យយូររហូតទាល់តែអន់ក្ដៅ ។ ការធ្វើតាមលក្ខណៈបែបនេះពីរបីដង (ក្នុងរយៈជាបន្តបន្ទាប់គ្នា) វានឹងធ្វើឲ្យអ្នកមានអារម្មណ៍ធូរស្បើយការឈឺត្រចៀក និងហ៊ឹងត្រចៀកជាដើម ។

ដកស្រង់ពីសៀវភៅចំណេះដឹងប្លែកៗ និពន្ធដោយ ស៊ឹង ណាំហុង

Tuesday, November 1, 2011

ពណ៌ទឹកនោមបញ្ជាក់ប្រាប់ពីសុខភាព

ដើម្បីទប់ទល់ ឬដោះស្រាយបញ្ហាឲ្យទាន់ពេលវេលា យើងគប្បីថែរក្សាសុខភាពឲ្យបានខ្ជាប់ខ្ជួន ។ ក្នុងចំណោមការថែទាំសុខភាពនេះ យើងគួរត្រួតពិនិត្យពណ៌ទឹកនោមឲ្យបានជាប់ជាប្រចាំ ព្រោះទឹកនោមអាចបញ្ជាក់ប្រាប់ពីរោគសញ្ញាមួយចំនួនកំពុងបៀតបៀនយាយីដូចជា ៖

ទឹកនោមបញ្ចេញមកលាយមានពណ៌ក្រហម

បើសិនជាទឹកនោមបញ្ចេញមកលាយពណ៌ក្រហម យើងត្រូវនឹកមើលខ្លួនឯងជាមុនសិនថាបានទទួលទានអាហារអ្វីដែលមានពណ៌លក្ខណៈបែបនេះដែរឬទេ ដូចជា ស្ពៃក្ដោបពណ៌ស្វាយ ទឹកក្រូចពណ៌ក្រហម ឬផ្លែស្រកានាគពណ៌ក្រហមជាដើម ។ បើក្នុងករណីមិនមានបរិភោគអ្វីដែលនាំឲ្យទឹកនោមបញ្ចេញពណ៌ទេនោះ បញ្ជាក់ថាអាចមានរោគអាក្រក់ចូលជ្រៀតជ្រែកហើយ ព្រោះថាពណ៌ក្រហមនោះអាចជាឈាមដែលបញ្ចេញមកពីក្រលៀន ឬតម្រងនោមរលាក ឬមិនដូច្នេះអាចមានអ្វីក្នុងរាងកាយដាច់រហែកយ៉ាងពិតប្រាកដ ហេតុនេះគួរទៅពិភាក្សាជាមួយគ្រូពេទ្យជាបន្ទាន់ ។

ទឹកនោមពណ៌ត្នោត

យើងអាចសង្កេតមើល២ចំណុច គឺអាចកើតមកពីការបរិភោគសណ្ដែកក្នុងចំនួនច្រើនពេក ឬអាចកើតមកពីរោគអាក្រក់ដោយសារឈាមកកខាងក្នុងហូរមកលាយឡំជាមួយ ហើយគួរពិភាក្សាជាមួយគ្រូពេទ្យដូចគ្នា ។

ទឹកនោមពណ៌លឿង

បើទឹកនោមបញ្ចេញមកពណ៌លឿងខ្ចី អាចកើតមកពីថាថ្ងៃនេះបានទទួលវីតាមីនបេ២ច្រើនពេក រហូតត្រូវបញ្ចេញមកវិញ ។ ប៉ុន្តែបើជាពណ៌លឿងចាស់ក៏បញ្ជាក់ថា អ្នកផឹកទឹកតិចពេក ហើយតែបើប្រាកដក្នុងចិត្តហើយថាបានផឹកទឹកច្រើន នៅតែទឹកនោមបញ្ចេញមកបែបនេះទៀត ចាំបាច់ត្រូវពិភាក្សាជាមួយគ្រូពេទ្យ ព្រោះអាចកើតរោគក្រលៀនបង្កប់ផ្នែកខាងក្នុង ។

ទឹកនោមពណ៌ល្អក់

ក្នុងករណីដែលទឹកនោមពណ៌ល្អក់ ឲ្យសាកល្បងផឹកទឹកក្រូចមើលថាបាត់ ឬក៏អត់ បើមិនបាត់អាចដោយសារមកពីការឆ្លងមេរោគប្រភេទខ្លះ និងអាការៈបែបនេះគួរពិភាក្សាជាមួយគ្រូពេទ្យផងដែរ ។

ទឹកនោមពណ៌ទឹកក្រូច

អាចកើតមកពីការប្រើថ្នាំ «ភូរីឌៀម» ដែលប្រើប្រាស់ក្នុងការព្យាបាលរោគក្រពះ ។

ទឹកនោមពណ៌ទឹកប៊ិក

បើថ្ងៃណាមួយទឹកនោមបញ្ចេញមកមានពណ៌បែបនេះ មិនចាំបាច់ប្លែកចិត្តទេ ពិសេសបើបរិភោគថ្នាំបំបាត់អាការៈទប់ទឹកនោមមិនជាប់ ព្រោះថាថ្នាំប្រភេទនេះមានលាយសារធាតុ «មេធីលីន» ទឹកនោមទើបបញ្ចេញមកមានពណ៌ទឹកប៊ិក ឬពណ៌ផ្ទែមេឃចាស់ ៕

(ពាក្យពេចន៍ក្នុងអត្ថបទនេះមានលក្ខណៈជាសម្ដីធម្មតារបស់អ្នកស្រុក មានចុះផ្សាយលើទំព័រសារព័ត៌មានរស្មីកម្ពុជា ថ្ងៃទី២៨ ខែកក្កដា ឆ្នាំ២០១០)

ការកែច្នៃត្រីលក្ខណៈគ្រួសារ

ក-គោលការណ៍ជាមូលដ្ឋាន

ផ្ដោតលើប្រព័ន្ធសិក្សារៀនសូត្ររបស់មនុស្សពេញវ័យប្រើប្រាស់ធនធានក្នុងតំបន់ (ធនធានមនុស្ស សម្ភារៈ ពលកម្ម ជាទុន) កៀងគរការចូលរួមរបស់កសិករនូវគ្រប់ដំណាក់កាលធ្វើផែនការអនុវត្ដន៍ផែនការត្រួតពិនិត្យ និងវាយតម្លៃ ។

ខ-មូលដ្ឋានថែរក្សាគុណភាពត្រី

១-តើអ្វីទៅជាគុណភាព ?

នៅក្នុងវចនានុក្រម «គុណភាព» មានន័យថា ជាកម្រិតភាពល្អស្អាតបំផុតរបស់ផលិតផលជលផល សម្រាប់ការកែច្នៃគុណភាព គឺជាស្ដង់ដារគំរូសម្រាប់កំណត់ពីសម្ថភាព ឬសណ្ឋានរបស់ត្រីដែលត្រូវយកមកធ្វើការកែច្នៃ ។ លើសពីនេះ គុណភាពជាអ្នកកំណត់ពីទំហំនៃការលក់ និងតម្លៃដែលអ្នកកែច្នៃទទួលបាន ។

២-ការវាស់វែងលើគុណភាព

គុណភាពអាចវាស់វែងបានដោយសារវិធីសាស្ដ្រគីមីសាស្ត្រ និងការពិនិត្យមើលសរីរាង្គខាងក្រៅរបស់ផលផលិតផល ។

៣-ការប៉ះពាល់ទៅលើគុណភាព

ក្នុងករណីមានការប្រឡាក់ឆ្លងជាមួយសារធាតុគីមីធ្វើឱ្យវត្ថុធាតុដើម និងផលិតផលមិនអាចធ្វើការកែប្រែគុណភាពបានទេ ពោលគឺត្រូវយកទៅកម្ទេចចោល ។ ការប្រឡាក់ឆ្លងខាងលើនេះក៏ជាមូលហេតុចម្បងធ្វើឱ្យត្រីខូចគុណភាព ។

៤-ចំណុចដែលត្រូវចងចាំ

អ្នកគួរតែសង្កេតមើលចំណុចប្រែប្រួលខ្លះៗដែលធ្វើឱ្យប៉ះពាល់ទៅដល់គុណភាពទូទៅរបស់វា ៖

ភ្នែកត្រីៈ ស្រអាប់មានឈាមពេញរង្វង់ភ្នែក រន្ធប្រស្រីភ្នែកទាំងមូលស្រអាប់
ស្រកីត្រីៈ ពណ៌ត្នោត និងមានរំអិល មានក្លិនមិនស្អុយ
រាងកាយៈ ពណ៌ក្រហមលឿង មានរំអិលច្រើន ជ្រុះស្រកា សាច់ទន់ជ្រាយ

គ- ការអនុវត្ដល្អសម្រាប់ផលិតផលប្រហុក

១-ការនេសាទត្រី

យើងដឹងហើយថា «ប្រហុក» ជាផលិតផលដែលមានក្លិនខុសពីផលិតផលជលផលដទៃទៀត ។ មានត្រីច្រើនប្រភេទណាស់ដែលត្រូវជ្រើសរើសយកមកកែច្នៃធ្វើប្រហុក ។ ត្រីមានគុណភាពល្អអាចជួយឲ្យផលិតផលប្រហុកមានគុណភាពល្អ និងឈ្ងុយឆ្ងាញ់ ។ យើងអាចប្រើប្រាស់វិធីសាស្ត្រខ្លះៗដើម្បីចាប់ត្រីពីវាលស្រែ ស្ទឹងត្រពាំង និងបឹង ។ វិធីសាស្ត្រចាប់ត្រីមានដូចខាងក្រោម ៖

សំណាញ់/អួន
រាយសន្ទូច
ស្ទូច ឬក៏វិធីសាស្ត្រជាច្រើនទៀតដែលមានលក្ខណៈប្រសើរជាងនេះ

២-ការយកត្រីពីកន្លែងចាប់

ការដាក់ត្រីនៅក្នុងឃ្លប់ទូកអាចប៉ះពាល់ដល់គុណភាពត្រី និងអាចប៉ះពាល់ដល់ផលិតផលរបស់អ្នក ។ ដាក់ត្រីនៅក្នុងម្លប់ ។ រក្សាដំណើរការនេសាទត្រីរបស់អ្នកឲ្យមានរយៈពេលខ្លី (តិចជាង៤ម៉ោង) ។ ដាក់ត្រីក្នុងជាលស្អាត ធ្វើអំពីជ័រប្លាស្ទិក ហើយដាក់កន្លែងស្អាតឆ្ងាយពីផ្លូវដើរចុះឡើង ។

៣-អនាម័យឧបករណ៍/សម្ភារៈ

ដើម្បីការពារការប្រឡាក់ឆ្លងមកលើផលិតផល អ្នកកែច្នៃត្រូវប្រើឧបករណ៍/សម្ភារៈដូចខាងក្រោម ៖

៤-ការរៀបចំត្រី

ជាទូទៅយើងអាចយកត្រីគ្រប់ប្រភេទមកធ្វើជាប្រហុកបាន ។ តែប្រភេទត្រីដែលធ្វើប្រហុកល្អជាងគេគឺ «ត្រីកំភ្លាញ» និង «ត្រីរ៉ស់» ។ មានវត្ថុធាតុដើមពីរយ៉ាងចំពោះការផលិតប្រហុក គឺ ត្រី និង អំបិល ។

៥-ការលាងសម្អាតត្រី

មេរោគត្រូវបានកាត់បន្ថយដោយសារការលាងសម្អាតត្រីមុនពេលដាក់ត្រីត្រាំទៅក្នុងពាង ។ សូមកុំប្រើទឹកកខ្វក់ដើម្បីលាងត្រី ឬក៏ប្រើទឹកក្នុងធុងដែលបានលាងម្ដងរួចហើយ ធ្វើដូចនេះមេរោគនឹងមិនអាចតោងជាប់ជាមួយសាច់ត្រី ។

ដាក់ត្រីហាលសម្រោះឱ្យស្រស់ទឹកក្នុងរយៈពេលពី១-២ម៉ោង ។ គឺដើម្បីបន្ថយសំណើមពីសាច់ត្រី ។

ដាក់ត្រីត្រាំក្នុងពាងទឹករហូតដល់ត្រីអណ្ដែតលើផ្ទៃទឹក ។ អ្នកត្រូវត្រាំត្រីប្រហែលពី៤-១២ម៉ោង ។

៦-អនុវត្តការប្រឡាក់ត្រី

ជំហានទី១: ហាលត្រីក្នុងម្លប់ឱ្យ់ស្រស់ទឹកបន្ទាប់ពីបានត្រាំពី៤-១២ម៉ោងរួចមក ដើម្បីរៀបចំប្រឡាក់ត្រី ហើយគ្របដើម្បីការពាររុយ ។ រួចអ្នកត្រូវហាលត្រីប្រហែល១ម៉ោង ។

ជំហានទី១: ហាលត្រីក្នុងម្លប់ឱ្យ់ស្រស់ទឹកបន្ទាប់ពីបានត្រាំពី៤-១២ម៉ោង រួចមក ដើម្បីរៀបចំប្រឡាក់ត្រី ហើយគ្របដើម្បីការពាររុយ ។ រួចអ្នកត្រូវហាលត្រីប្រហែល១ម៉ោង ។

ជំហានទី២: ផ្នែកនេះមានសារៈសំខាន់ណាស់ ។ ប្រសិនបើការប្រឡាក់អំបិលមិនបានសព្វនោះប្រហុកពុំមានគុណភាពទេ ។ អ្នកត្រូវប្រើអំបិល៣០គក្រ ប្រឡាក់ជាមួយត្រី១០០គក្រ ។

ជំហានទី២: ផ្នែកនេះមានសារៈសំខាន់ណាស់ ។ ប្រសិនបើការប្រឡាក់អំបិលមិនបានសព្វនោះប្រហុកពុំមានគុណភាពទេ ។ អ្នកត្រូវប្រើអំបិល៣០គក្រ ប្រឡាក់ជាមួយត្រី១០០គក្រ ។

ជំហានទី៣: អ្នកត្រូវប្រើពាងដើម្បីផ្អាប់ប្រហុកទុកក្នុងរយៈពេល១ថ្ងៃ ។ ធ្វើដូចនេះគឺដើម្បីឱ្យអំបិលជ្រាបចូលក្នុងសាច់ប្រហុកបានល្អ ។

ជំហានទី៣: អ្នកត្រូវប្រើពាងដើម្បីផ្អាប់ប្រហុកទុកក្នុងរយៈពេល១ថ្ងៃ ។ ធ្វើដូចនេះគឺដើម្បីឱ្យអំបិលជ្រាបចូលក្នុងសាច់ប្រហុកបានល្អ ។

ជំហានទី៤: បន្ទាប់ពីបានផ្អាប់ត្រីរយៈពេល១ថ្ងៃរួចមក ត្រូវយកត្រីទៅសម្រោះទឹកអំបិលចេញ ។ អ្នកត្រូវប្រើចានធំ ធ្វើអំពីជ័រ ឬអ៊ីណុកដើម្បីត្រងយកទឹកអំបិលសម្រាប់កែច្នៃជាផលិតផលផ្សេងៗទៀត ។

ជំហានទី៤: បន្ទាប់ពីបានផ្អាប់ត្រីរយៈពេល១ថ្ងៃរួចមក ត្រូវយកត្រីទៅសម្រោះទឹកអំបិលចេញ ។ អ្នកត្រូវប្រើចានធំ ធ្វើអំពីជ័រ ឬអ៊ីណុកដើម្បីត្រងយកទឹកអំបិលសម្រាប់កែច្នៃជាផលិតផលផ្សេងៗទៀត ។

ជំហានទី៥: ដំណាក់កាលនេះ អ្នកត្រូវយកសាច់ប្រហុកទៅហាលលីទ្រនើរប្រហែល២ម៉ោង រួចគ្របប្រហុកដោយប្រើស្បៃមុង ។

ជំហានទី៥: ដំណាក់កាលនេះ អ្នកត្រូវយកសាច់ប្រហុកទៅហាលលីទ្រនើរប្រហែល២ម៉ោង រួចគ្របប្រហុកដោយប្រើស្បៃមុង ។

ជំហានទី៦: ការប្រឡាក់អំបិលសាជាថ្មី អ្នកត្រូវប្រើអំបិល៣៥គក្រ ប្រឡាក់ជាមួយប្រហុក១០០គក្រដោយប្រើត្បាល់ជាន់ ឬត្បាល់បុកដៃ ដោយបុកឲ្យសព្វសាច់ប្រហុក ។

ជំហានទី៧: ចាក់អំបិលគ្របលើសាច់ប្រហុក បន្ទាប់មកប្រើបន្ទះឫស្សីខ្ទាស់ឱ្យជាប់ ហើយលាយទឹកអំបិលចាក់ពីលើឱ្យលិចបន្ទះឫស្សី (ដោយប្រើអំបិល៥គក្រលាយជាមួយទឹកស្អាត ឬទឹកដាំពុះទុកឱ្យត្រជាក់ចំនួន២០លីត្រ) រួចចងមាត់ពាងឱ្យជាប់ដោយប្រើបន្ទះក្ដារដាក់ពីលើ និងសង្កត់ដោយដុំឈើ ឬរបស់ដែលមានទម្ងន់ ។

៧-ការទុកដាក់ប្រហុកនៅកន្លែងស្អាត

កត់ត្រាថ្ងៃខែឆ្នាំនៃការទុកដាក់ប្រហុក
កត់ត្រាប្រភេទប្រហុក (ប្រហុកសាច់ ឬប្រហុកឆ្អឹង)
កត់ត្រាប្រភេទត្រី

៨-ការវេចខ្ចប់ប្រហុក

លាងក្រឡឱ្យស្អាតហាលថ្ងៃឱ្យស្ងួត
ផ្ទេរប្រហុកដោយប្រុងប្រយ័ត្នដាក់ក្នុងក្រឡ
សរសេរថៃខ្ងែឆ្នាំនៃការវេចខ្ចប់ ប្រភេទត្រី ប្រភេទប្រហុក ទុកដាក់ប្រហុកដែលបានវេចខ្ចប់រួចក្នុងកន្លែងស្អាត ។

លាងក្រឡឱ្យស្អាតហាលថ្ងៃឱ្យស្ងួត

៩-កន្លែងទុកដាក់ប្រហុកគួរតែ

ដំបូលប្រក់ស័ង្កសី
ជញ្ជាំងអាចជាក្ដារ
មានប្រហោងខ្យល់ចេញចូល
សត្វមិនអាចចូលបាន
កណ្ដុរមិនអាចចូលបាន
មានគន្លឹះអាចបិទបើកបាន

ឃ-ផលិតផលត្រីផ្សេងទៀត

១-ការធ្វើផ្អក

ក-វត្ថុធាតុដើមៈ

ត្រី និង អំបិល

ខ-គ្រឿងផ្សំៈ

អង្ករលីង ឬបបរខាប់ ស្ករត្នោត

គ-សម្ភារៈ

ជាល ឬទ្រនើរ ធុង ឬខាប់ (ក្រឡ)
ចានធំធ្វើអំពីជ័រ កាំបិត ជ្រញ់ជ័រ
ស្បៃមុង កន្ទាស់ឫស្សី ស្លឹកចេក

ឃ-វិធីធ្វើ

យកសាច់ត្រីហាលសម្រោះរួចទៅប្រឡាក់ (ត្រី១០០គក្រ អំបិល៨០គក្រ)
ផ្អាប់ត្រីក្នុងពាងយ៉ាងយូរ១សប្ដាហ៍ រួចហាលសម្រោះទឹក

ង-វិធីចាវផ្អក

វិធីទី១: បើចង់ឱ្យឆាប់ជូរសូមធ្វើតាមវិធីខាងក្រោម ៖

ប្រឡាក់ជាមួយបបរខាប់ (ត្រី១០០គក្រ លាយបបរ១ឆ្នាំងលេខ៨)
ផ្អាប់ទុករហូតដល់ផ្អកមានក្លិនជូរ

(ចំណាំៈ វិធីនេះមិនអាចទុកផ្អកបានយូរទេ)

វិធីទី២:

យកត្រីទៅប្រឡាក់ជាមួយអង្ករលីងរួចបុកឱ្យស្អិត (ត្រី១០០គក្រ អង្ករលីង៣០គក្រ)
ដាក់ស្ករត្នោត (ត្រី១០០គក្រ ស្ករត្នោត២-៣គក្រ)
ផ្អាប់ទុករហូតដល់ផ្អកជូរ និងមានក្លិនឈ្ងុយ ។

(ចំណាំៈ វិធីនេះអាចរក្សាទុកផ្អកបានយូរ)

* ចំពោះការរក្សាទុកផ្អក គឺធ្វើដូចគ្នានឹងការរក្សាទុកប្រហុកដែរ ។

២-ការធ្វើត្រីងៀត

ក-វត្ថុធាតុដើមៈ

ត្រី និង អំបិល

ខ-គ្រឿងផ្សំៈ

ប៊ីចេង ស្ករត្នោត

គ-សម្ភារៈ

ជាល ឬទ្រនើរ ធុង ចានធ្វើអំពីជ័រ កាំបិត ជ្រញ់ជ័រ
ស្បៃមុង កន្ទាស់ឫស្សី ស្លឹកចេក

ឃ-វិធីធ្វើ

វិធីទី១:

យកសាច់ត្រីហាលសម្រោះរួចទៅប្រឡាក់ (ត្រី១០០គក្រ អំបិល១៥-២០គក្រ ប៊ីចេង៣០ក្រាម)
យកសរត្នោត១គក្រទៅកម្លោចឱ្យក្រហមក្រម៉ៅទុកឱ្យត្រជាក់ រួចយកទៅប្រឡាក់ជាមួយត្រី បន្ទាប់មកផ្អាប់ទុកចំនួន១២ម៉ោង
បន្ទាប់មក ស្រង់ត្រីយកទៅហាលឱ្យស្ងួត

(ចំណាំៈ វិធីនេះមិនអាចទុកបានយូរទេ)

វិធីទី២:

យកសាច់ត្រីហាលសម្រោះរួចទៅប្រឡាក់ (ត្រី១០០គក្រ អំបិល១៥-២០គក្រ ប៊ីចេង៣០ក្រាម)
ផ្អាប់ត្រីទុកចំនួន១២ម៉ោង
ស្រង់យកត្រីទៅហាលថ្ងៃរួមប្រើស្បៃមុងគ្របដើម្បីការពាររុយ
បន្តការហាលត្រីរហួតដល់ត្រីស្ងួតល្អ

(ចំណាំៈ វិធីនេះអាចថែរក្សាទុកបានយូរ)

ង-ការថែទាំ

ទុកដាក់ត្រីក្នុងម្លប់ឱ្យមានគម្លាតពីគា្ន (២សង់ទីម៉ែត្រ)
ឧស្សាហ៍ហាលត្រី និងពិនិត្យមើលក្រែងមានដុះផ្សិត

៣-ការធ្វើត្រីប្រឡាក់

ក-វត្ថុធាតុដើមៈ

ត្រី និង អំបិល

ខ-គ្រឿងផ្សំៈ

ម្រេច សរ ប៊ីចេង ខ្ទឹម

គ-សម្ភារៈ

ជាល ឬទ្រនើរ ធុង ចានដែក កាំបិត ជ្រញ់ ស្បៃមុង

ឃ-វិធីធ្វើ

វិធីទី១: ចំពោះត្រីមានស្រកា

ស្រកា វះពោះ កាត់ក្បាល ឆូតលើខ្លួនត្រី
លាងសម្រោះរួចប្រឡាក់អំបិល (ត្រី១០០គក្រ អំបិល១៥-២០គក្រ)
ផ្អាប់ទុករយៈពេល១២ម៉ោង រួចហាលសម្រោះទឹកចេញ

វិធីទី២: ចំពោះត្រីគ្មានស្រកា

ពុះពីខាងខ្នងត្រីដោយមិនបាច់កាត់ក្បាល
លាងសម្រោះទុករួចយកទៅប្រឡាក់ (ត្រី១០០គក្រ អំបិល១០-១៥គក្រ)
ផ្អាប់ទុករយៈពេល១២ម៉ោង
ស្រង់ត្រីយកទៅហាលសម្រោះទឹក បន្ទាប់មកយកត្រីទៅហាលថ្ងៃឱ្យស្ងួត

ង-វិធីថែរក្សា

ដាក់ ឬព្យួរត្រីនៅកន្លែងមានម្លប់ដោយរក្សាគម្លាតប្រហែល២សង់ទីម៉ែត្រ
ឧស្សាហ៍ហាលត្រី និងត្រួតពិនិត្យមើលក្រែងត្រីមានដុះផ្សិត ឬប៉ះពាល់ដោយសត្វល្អិត ឬខូចត្រូវបំផ្លាញវាចោលភ្លាម ។

៤-ការធ្វើប្រហិតសាច់ត្រី

ប្រភេទត្រីក្រាយ ស្លាត ស ក្រុះ ឆ្កោក ច្រកែង និងឆ្ពិន ។ល ។

ក-វត្ថុធាតុដើមៈ

ត្រី និង អំបិល

ខ-គ្រឿងផ្សំៈ

ម្រេច ស្ករ ប៊ីចេង ខ្ទឹម

គ-សម្ភារៈ

ទ្រនើរ ធុង ចានធំធ្វើអំពីជ័រ កាំបិត ជ្រញ់ជ័រ
ត្បាល់ជាន់ ឬត្បាល់បុក ឬឧបករណ៍សម្រាប់កិនសាច់ត្រី

ឃ-វិធីធ្វើ

លាងត្រីឱ្យស្អាត បកស្បែកចៀរយកសាច់ត្រីសុទ្ធ
ចិញ្ច្រាំ ឬកិនឱ្យម៉ដ្ឋ
បុកសាច់ត្រីទាល់តែសាច់ត្រីនោះឡើងស្អិត
យកសាច់ត្រីទៅលាយជាមួយគ្រឿងផ្សំ ។ សាច់ត្រី៤៤កគ្រលាយជាមួយ អំបិល២គក្រ ស្ករស ១,១គក្រ ប៊ីចេង៥០ក្រាម ម្រេច៣០០ក្រាម ខ្ទឹមស៥កំពឹស
វឹក ឬកិនបញ្ចូលគ្នាឱ្យសព្វរយៈពេល១៥នាទី រួចយកសាច់ត្រីទៅក្លាស្សេទឹកកក១៥គក្រ

(ចំណាំៈ ប្រហិតសាច់ត្រីក្រោយពីបានធ្វើរួចហើយ អាចយកទៅធ្វើម្ហូប និងអាចលក់ដូរបាន)

ឯកសារបណ្ដុះបណ្ដាលរបស់ក្រុមហ៊ុន CATIS Consultant

ល្ពៅមានប្រយោជន៍ដល់សុខភាពរាងកាយ

ល្ពៅមានប្រយោជន៍ដល់សុខភាពរាងកាយ ពិសេសអាចការពារការកើតទឹកនោមផ្អែម

ល្ពៅមានប្រយោជន៍ដល់សុខភាព ពិសេសអាចការពារការកើតទឹកនោមផ្អែម

ផ្លែល្ពៅជាប្រភេទបន្លែម្យ៉ាងមានប្រយោជន៍ដល់សុខភាពរាងកាយរបស់មនុស្ស ។ ខាងក្រោមនេះជាវិធីសាស្ដ្រមួយចំនួនដែលល្ពៅផ្ដល់សារធាតុយ៉ាងសំខាន់ដល់សុខភាពដូចជា ៖

ល្ពៅមានរសជាតិផ្អែមៈ ជាប្រភេទបន្លែម្យ៉ាងមានសារធាតុបេតាឃែរ៉ូទីនខ្ពស់ បង្ការការកើតជំងឺមហារីក ជាពិសេសមហារីកបោ្លកនោម ចំពោះអ្នកដែលមានវ័យចំណាស់ ការពារជំងឺសើស្បែក និងបន្ថយអាការឈឺចុករោយនៅក្បាលជង្គង់ និងចង្កេះ ព្រមទាំងមានប្រយោជន៍ដល់ការការពារអាការជំងឺស្វិតដៃជើងបានទៀត ។

ល្ពៅអាចការពារជំងឺទឹកនោមផ្អែមៈ ក្រៅពីនេះល្ពៅក៏អាចការពារជំងឺលើសឈាម ជួយទ្រទ្រង់ដល់ថ្លើម និងភ្នែកផងដែរ ។

ល្ពៅជាបន្លែដែលមានសារធាតុសរសៃខ្ពស់ៈ លើសពីនេះទៀតវាជាប្រភេទអាហារផ្ដល់ថាមពលក្នុងខ្លួនប្រាណមានកម្រិតទាប ជាតិខ្លាញ់តិច សមស្របទៅនឹងអ្នកដែលត្រូវការគ្រប់គ្រងទម្ងន់ ។ សារធាតុកាបូនអ៊ីដ្រាតនៅក្នុងល្ពៅជួយបំបាត់ដំបៅនៅក្នុងក្រពះ និងពោះវៀន ។

ល្ពៅនឹងជួយកម្ចាត់កំហាកស្លេស្មៈ ជាបន្លែម្យ៉ាងដែលផ្ដល់ផលប្រយោជន៍ដល់រាងកាយ ជួយបំបាត់ស្លេស្មក្នុងបំពង់ក និងជួយដល់សួត បន្ថយអាការនៃជំងឺហឺត ដែលកើតពីអាការៈរលាកបំពង់ខ្យល់ដកដង្ហើមដ៏រ៉ាំរ៉ៃរបស់អ្នកដែលមានវ័យចំណាស់ ជួយទំនុកបម្រុងលើកស្ទួយកម្លាំង សមស្របទៅលើអ្នកដែលមានសួត និងតម្រងនោមចុះខ្សោយ ។

គ្រាប់ល្ពៅៈ មានគុណប្រយោជន៍ក្នុងការការពារ និងកាត់បន្ថយឱកាសនៃកើតក្រួសក្នុងតម្រងនោម និងមានប្រសិទ្ធភាពជាប្រភេទថ្នាំបញ្ចុះព្រូន ឬតេនញ៉ា ។

ប្រេងល្ពៅៈ ប្រេងដែលចម្រាញ់ចេញពីគ្រាប់មានរសជាតិផ្អែម អាចយកមកទទួលទានជួយទំនុកបម្រុងដល់សរសៃប្រសាទ ៕

សារព័ត៌មានកោះសន្តិភាព ថ្ងៃទី៦ ខែសីហា ឆ្នាំ២០១០

របៀបដាក់ឈ្មោះឲ្យកូនចៅរបស់ខ្មែរបុរាណ

តាមប្រពៃណីខ្មែរយើងនៅសម័យបុរាណ ការដាក់ឈ្មោះឲ្យកូនចៅនីមួយៗគេច្រើនប្រកាន់ណាស់ ។ គេពុំមែនចេះតែដាក់ឈ្មោះឲ្យដោយពុំបានរកគ្រូអាចារ្យដើម្បីគន់គូរទស្សទាយដោយក្បួនវេទជាមុនឡើយ ។ ផ្ទុយទៅវិញ ការដាក់ឈ្មោះនេះ គេច្រើនតម្រូវទៅតាមឫក្សពារ តាមពេលាល្អ ឡើងស័ក្ត ឡើងរាសី សមតាមលំដាប់ថ្ងៃខែនៃកំណើតទារកដែលមានអត្ថន័យសំខាន់ស្របតាមគម្ពីបាលី និងស្របតាមសេចក្ដីប្រាថ្នានៃមាតាបិតាចំពោះអនាគតនៃទារកទាំងនោះ ។

នឹងឲ្យឈ្មោះនោះទៀត គេត្រូវកម្រិតចំនួនព្យាង្គ គឺចំនួនពាក្យក្នុងឈ្មោះនីមួយៗស្របតាមវណ្ណៈគ្រួសារដើម្បីជាវិន័យមួយសម្រាប់សម្គាល់ដោយប្រាកដនូវអម្បូរ ពូជ ពង្ស នៃគ្រួសារដូចតទៅ ៖

ក. ចំពោះព្រះរាជបុត្រព្រះមហាក្សត្រ
ព្រះនាមនីមួយៗត្រូវមានពាក្យពីបួនព្យាង្គឡើងទៅ ដូចជា ព្រះរាជបុត្រព្រះបាទជ័យវរ្ម័នទី៧: វិរកុមារ សុរិយកុមារ ។ ព្រះបរមនាមព្រះបាទនរោត្ដម គឺ រាជាវត្តី ព្រះបាទស៊ីសុវត្ថិ គឺ សេរីសុវត្ថិ ។

ខ. ចំពោះព្រះរាជវង្សានុវង្ស និងមន្ត្រី
ដែលព្រះរាជាតាំងជាក្សត្រពេញអង្គ ព្រះនាមត្រូវមានយ៉ាងច្រើនត្រឹមតែបីព្យាង្គ ដូចជា វីរិយៈ ប៉ូរក្ខស៊ី ឥន្ទ្រាវង្ស (ក្រុមក្សត្រ) បលីវ័ណ្ណ ទេពអរជូន ពិស្ណុលោក (មន្ត្រីរាជវង្ស) ។

គ. ចំពោះបុត្រមន្ត្រី គហបតី និងមន្ត្រីកិត្តិយស
នាមបុត្រត្រូវមានយ៉ាងច្រើនត្រឹមតែពីរព្យាង្គ ដូចជា សម្បត្តិ ចម្រើន សុខា សម្បូរណ៍ ។ល។

ឃ. ចំពោះបុត្រប្រជារាស្ត្រសាមញ្ញទូទៅ
នាមបុត្រមានតែមួយព្យាង្គ ឬមួយម៉ាត់ទេ ពោលគឺឈ្មោះ សុខ សៅ ម៉ែន ម៉ុក ជា គង់ ។ល។

បើប្រជារាស្ត្រទាំងនេះ បានឡើងបុណ្យស័ក្តិធ្វើជាមន្ត្រីកាលណា គេគ្រាន់តែបន្ថែមទៅលើឈ្មោះទាំងនោះនូវគោរម្យងារ ដូចជា ហ្លួង ពញា ឧកញ៉ា ។ល។

(ដកស្រង់ពីសៀវភៅបរិវារស័ព្ទក្នុងភាសាខ្មែរ របស់លោក ស៊ីសុវត្ថិ ប៉ូរក្ខស៊ី)

សមាសភាពចៅក្រមកាត់ក្ដីបណ្ដឹងបកស្រាយសាលក្រមរឿងព្រះវិហារ

ដកស្រង់ចេញពី៖ Chouk Khmer

ខ្ញុំចាប់អារម្មណ៍នឹងសមាសភាពចៅក្រមនៃតុលាការយុត្តិធម៌អន្តរជាតិ (ICJ) នៅទីក្រុងឡាអេ ដែលកំពុងកាន់ក្ដីរឿងបណ្ដឹងបកស្រាយសាលក្រមថ្ងៃទី១៥ ខែមិថុនា ឆ្នាំ១៩៦២ ពាក់ព័ន្ធនឹងប្រាសាទព្រះវិហារ (ខ្មែរ ទល់នឹង សៀម) ប៉ុន្តែហាក់ដូចជារកមិនឃើញគេហទំព័រ ឬប្លុកជាខ្មែរណាមួយរៀបរាប់បង្ហាញពីរឿងនេះសោះ ទាល់តែអានទំព័រជាភាសាគេ ទើបដឹងរឿង ។ ដូចនេះខ្ញុំសូមលើកយកមកបង្ហាញនៅទីនេះ ព្រមជាមួយកំណត់សម្គាល់អំពីការសម្រេចលើវិធានការបន្ទាន់កាលពីថ្ងៃទី១៨ ខែកក្កដា ឆ្នាំ២០១១ ផង ដើម្បីទុកជាកាលប្បវត្តិ ។

សមាសភាពចៅក្រម

ចៅក្រមតុលាការយុត្តិធម៌អន្តរជាតិ ដែលបានទទួលដោះស្រាយពាក្យបណ្ដឹងបកស្រាយសាលក្រមឆ្នាំ១៩៦២ របស់កម្ពុជាទល់នឹងសៀម មានចំនួន ១៦ រូប ក្នុងនោះ ១៤ រូប ជាសមាជិកតុលាការយុត្តិធម៌អន្តរជាតិ និង ២ រូប ជាចៅក្រមមិនអចិន្ត្រៃយ៍ តែងតាំងដោយកម្ពុជា និងសៀម ។

ចៅក្រម Hisashi Owada ជនជាតិជប៉ុន

ប្រធានតុលាការយុត្តិធម៌អន្តរជាតិ

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៣ និងជាប្រធានតុលាការពីថ្ងៃទី៦ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១២

ថ្ងៃខែឆ្នាំ និងទីកន្លែងកំណើត: ថ្ងៃទី១៨ ខែកញ្ញា ឆ្នាំ១៩៣២ នៅខេត្ត Niigata ប្រទេសជប៉ុន

ចៅក្រម Peter Tomka ជនជាតិស្លូវ៉ាគី

អនុប្រធានតុលាការយុត្តិធម៌អន្តរជាតិ

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៣ និងជាអនុប្រធានតុលាការពីថ្ងៃទី៦ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១២

ថ្ងៃខែឆ្នាំ និងទីកន្លែងកំណើត: ថ្ងៃទី១ ខែមិថុនា ឆ្នាំ១៩៥៦ នៅ Banská Bystrica ប្រទេសស្លូវ៉ាគី

ចៅក្រម Abdul G. Koroma ជនជាតិសៀរ៉ាឡេអូន

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ១៩៩៤ និងត្រូវបានជ្រើសតាំងម្ដងទៀតពីថ្ងៃទី៦ ខែកុម្ភៈ ឆ្នាំ២០០៣ ចប់អាណត្តិឆ្នាំ២០១២

ថ្ងៃខែឆ្នាំ និងទីកន្លែងកំណើត: ថ្ងៃទី២៩ ខែកញ្ញា ឆ្នាំ១៩៤៣ នៅ Freetown ប្រទេសសៀរ៉ាឡេអូន

ចៅក្រម Awn Shawkat Al-Khasawneh ជនជាតិហ្ស៊កដានី

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០០ ជ្រើសតាំងម្ដងទៀតនៅថ្ងៃទី៥ ខែកុម្ភៈ ឆ្នាំ២០០៩ និងជាអតីតអនុប្រធានតុលាការពីថ្ងៃទី៦ ខែកុម្ភៈ ឆ្នាំ២០០៦ ដល់ទី៥ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១៨

ថ្ងៃខែឆ្នាំ និងទីកន្លែងកំណើត: ថ្ងៃទី២២ ខែកុម្ភៈ ឆ្នាំ១៩៥០ នៅ Amman ប្រទេសហ្ស៊កដានី

ចៅក្រម Bruno Simma ជនជាតិអាល្លឺម៉ង់

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៣ ចប់អាណត្តិឆ្នាំ២០១២

ថ្ងៃខែឆ្នាំ និងទីកន្លែងកំណើត: ថ្ងៃទី២៩ ខែមីនា ឆ្នាំ១៩៤១ នៅ Quierschied (Saar) ប្រទេសអាល្លឺម៉ង់

ចៅក្រម Ronny Abraham ជនជាតិបារាំង

ជាសមាជិកតុលាការ ពីថ្ងៃទី១៥ ខែកុម្ភៈ ឆ្នាំ២០០៥ និងជ្រើសតាំងម្ដងទៀតនៅថ្ងៃទី៥ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១៨

ថ្ងៃខែឆ្នាំ និងទីកន្លែងកំណើត: ថ្ងៃទី៥ ខែកញ្ញា ឆ្នាំ១៩៥១ នៅ Alexandria ប្រទេសអេហ្ស៊ីប

ចៅក្រម Kenneth Keith ជនជាតិនូវែលសេឡង់

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៦ ចប់អាណត្តិឆ្នាំ២០១៥

ថ្ងៃខែឆ្នាំ និងទីកន្លែងកំណើត: ថ្ងែទី១៩ ខែវិច្ឆិកា ឆ្នាំ១៩៣៧ នៅ Auckland ប្រទេសនូវែលសេឡង់

ចៅក្រម Mohamed Bennouna ជនជាតិម៉ារ៉ុក

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៦ ចប់អាណត្តិឆ្នាំ២០១៥

ថ្ងៃខែឆ្នាំ និងទីកន្លែងកំណើត: ថ្ងៃទី២៩ ខែមេសា ឆ្នាំ១៩៤៣ នៅ Marrakesh ប្រទេសម៉ារ៉ុក

ចៅក្រម Leonid Skotnikov ជនជាតិរុស្ស៊ី

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៦ ចប់អាណត្តិឆ្នាំ២០១៥

ថ្ងៃខែឆ្នាំ និងទីកន្លែងកំណើត: ថ្ងៃទី២៦ ខែកុម្ភៈ ឆ្នាំ១៩៥១ នៅ Kalinin ប្រទេសរុស្ស៊ី

ចៅក្រម Antônio A. Cançado Trindade ជនជាតិប្រេស៊ីល

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១៨

ថ្ងៃខែឆ្នាំ និងទីកន្លែងកំណើត: ថ្ងៃទី១៧ ខែកញ្ញា ឆ្នាំ១៩៤៧ នៅ Belo Horizonte ប្រទេសប្រេស៊ីល

ចៅក្រម Abdulqawi Ahmed Yusuf ជនជាតិសូម៉ាលី

ចៅក្រម Abdulqawi Ahmed Yusuf ជនជាតិសូម៉ាលី

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១៨

ថ្ងៃខែឆ្នាំ និងទីកន្លែងកំណើត: ថ្ងៃទី១២ ខែកញ្ញា ឆ្នាំ១៩៤៨ នៅ Eyl ប្រទេសសូម៉ាលី

ចៅក្រម Christopher Greenwood ជនជាតិអង់គ្លេស

ជាសមាជិកតុលាការ ពីថ្ងៃទី៦ ខែកុម្ភៈ ឆ្នាំ២០០៩ ចប់អាណត្តិឆ្នាំ២០១៨

ថ្ងៃខែឆ្នាំ និងទីកន្លែងកំណើត: ថ្ងៃទី១២ ខែឧសភា ឆ្នាំ១៩៥៥ នៅ Wellingborough នៅចក្រភពអង់គ្លេស

ចៅក្រម Xue Hanqin ជនជាតិចិន

ជាសមាជិកតុលាការ ពីថ្ងៃទី៦ ខែមិថុនា ឆ្នាំ២០១០ ចប់អាណត្តិឆ្នាំ២០១២

ថ្ងៃខែឆ្នាំ និងទីកន្លែងកំណើត: ថ្ងៃទី១៥ ខែកញ្ញា ឆ្នាំ១៩៥៥ នៅក្រុងសៀងហៃ ប្រទេសចិន

ចៅក្រម Joan E. Donoghue ជនជាតិអាមេរិក

ជាសមាជិកតុលាការ ពីថ្ងៃទី៩ ខែកញ្ញា ឆ្នាំ២០១០ ចប់អាណត្តិឆ្នាំ២០១៥

ថ្ងៃខែឆ្នាំកំណើត: ថ្ងៃទី១២ ខែធ្នូ ឆ្នាំ១៩៥៧

ចៅក្រមមិនអចិន្ត្រៃយ៍ Gilbert Guillaume ជនជាតិបារាំង

តែងតាំងដោយប្រទេសកម្ពុជា

ជាអតីតប្រធានតុលាការយុត្តិធម៌អន្តរជាតិពីឆ្នាំ២០០០ ដល់ឆ្នាំ២០០៣

ថ្ងៃខែឆ្នាំ និងទីកន្លែងកំណើត: ថ្ងៃទី៤ ខែធ្នូ ឆ្នាំ១៩៣០ នៅ Bois-Colombes ប្រទេសបារាំង

ចៅក្រមមិនអចិន្ត្រៃយ៍ Jean-Pierre Cot ជនជាតិបារាំង

តែងតាំងដោយប្រទេសសៀម

ជាសាស្ត្រាចារ្យច្បាប់អន្តរជាតិ និងជាចៅក្រមតុលាការអន្តរជាតិច្បាប់សមុទ្រ

ថ្ងៃខែឆ្នាំ និងទីកន្លែងកំណើត: ថ្ងៃទី២៣ ខែតុលា ឆ្នាំ១៩៣៧ នៅក្រុងហ្ស៊ឺណែវ ប្រទេសស៊្វីស

សេចក្ដីសម្រេចវិធានការបន្ទាន់ ១៨ កក្កដា ២០១១

តាមសំណើរបស់រាជរដ្ឋាភិបាលកម្ពុជា ដែលបានស្នើសុំតុលាការយុត្តិធម៌អន្តរជាតិទីក្រុងឡាអេ ចង្អុលអំពីវិធានការបន្ទាន់ដែលជាជំហានទី១ នៃការបកស្រាយសាលក្រមថ្ងៃទី១៥ ខែមិថុនា ឆ្នាំ១៩៦២ ទាក់ទងនឹងប្រាសាទព្រះវិហារ តុលាការនេះបានចេញនូវសេក្ដីសម្រេចរបស់ខ្លួន នៅថ្ងៃទី១៨ ខែកក្កដា ឆ្នាំ២០១១ ដូចតទៅ ៖

តុលាការបានសម្រេច

ក. ជាឯកច្ឆ័ន្ទ

ច្រានចោលនូវសំណើរបស់ព្រះរាជាណាចក្រថៃឡង់ដ៍ ដែលបានស្នើសុំដកសំណើរបស់ព្រះរាជាណាចក្រកម្ពុជា កាលពីថ្ងៃទី២៨ ខែមេសា ឆ្នាំ២០១១ ចេញពីរបៀបវារៈរួមរបស់តុលាការ ។

ខ. ចង្អុលនូវវិធានការបណ្ដោះអាសន្នដូចតទៅ:

១. ដោយសំឡេង ១១ ទល់នឹង ៥

ភាគីទាំងពីរត្រូវដកជាបន្ទាន់នូវបុគ្គលិកយោធា ដែលមានវត្តមានបច្ចុប្បន្ននៅក្នុងតំបន់គ្មានយោធាជាបណ្ដោះអាសន្នដូចមានចែងក្នុងកថាខ័ណ្ឌ ៦២ នៃសេចក្ដីសម្រេចនេះ និងទប់ស្កាត់មិនឲ្យមានវត្តមានយោធាក្នុងតំបន់នោះ និងមិនអោយមានសកម្មភាពប្រដាប់អាវុធណាមួយតម្រង់ទៅកាន់តំបន់នោះឡើយ ។

គាំទ្រ: ចៅក្រម Peter Tomka ចៅក្រម Abdul G. Koroma ចៅក្រម Bruno Simma ចៅក្រម Ronny Abraham ចៅក្រម Kenneth Keith ចៅក្រម Mohamed Bennouna ចៅក្រម Leonid Skotnikov ចៅក្រម Antônio A. Cançado Trindade ចៅក្រម Abdulqawi Ahmed Yusuf ចៅក្រម Christopher Greenwood ចៅក្រមមិនអចិន្ត្រៃយ៍ Gilbert Guillaume

ជំទាស់: ចៅក្រម Hisashi Owada ចៅក្រម Awn Shawkat Al-Khasawneh ចៅក្រម Xue Hanqin ចៅក្រម Joan E. Donoghue ចៅក្រមមិនអចិន្ត្រៃយ៍ Jean-Pierre Cot

២. ដោយសំឡេង ១៥ ទល់នឹង ១

ប្រទេសថៃមិនត្រូវរារាំងការចេញចូលដោយសេរីរបស់កម្ពុជាទៅកាន់ប្រាសាទព្រះវិហារ ឬការផ្គត់ផ្គង់ស្បៀងអហារចំពោះបុគ្គលិកដែលមិនមែនយោធានៅក្នុងប្រាសាទឡើយ ។

គាំទ្រ: ចៅក្រម Hisashi Owada ចៅក្រម Peter Tomka ចៅក្រម Abdul G. Koroma ចៅក្រម Awn Shawkat Al-Khasawneh ចៅក្រម Bruno Simma ចៅក្រម Ronny Abraham ចៅក្រម Kenneth Keith ចៅក្រម Mohamed Bennouna ចៅក្រម Leonid Skotnikov ចៅក្រម Antônio A. Cançado Trindade ចៅក្រម Abdulqawi Ahmed Yusuf ចៅក្រម Christopher Greenwood ចៅក្រម Xue Hanqin ចៅក្រមមិនអចិន្ត្រៃយ៍ Gilbert Guillaume ចៅក្រមមិនអចិន្ត្រៃយ៍ Jean-Pierre Cot